1
Isiyaka ɔŋc-yɔnɛ wətem, fɔr yɔc-lɔl kɔ haŋ kɔ tɛləpsər kɔ kətɔnəŋk. K'ewe wan kɔn wəcɔkɔ-cɔkɔ Esay, k'oloku kɔ: «Wan kem!» Kɔ Esay owosɛ: «In' ɛwɛ!»
2
Kɔ Isiyaka ɔŋgbɔkərɛ: «Iyɔnɛ wətem, iŋcərɛ fɛ dɔsɔk dem defi.
3
Məlɛk oŋ yɛpɛnɛ yam, abom ŋam kɔ ambəŋcəran, məkɔ dəkulum məkɔ məpɛn' em wɛsɛm.
4
Məlompəs' em peri pəmɔ tɔkɔ imbɔtər ti mɔ. Məkɛr' em pi, idi, ntɛ tɔŋsɔŋɛ ina yati itolan' am pətɔt a ic-fi mɔ.»
5
Rebeka pəc-cəŋkəl tɔkɔ Isiyaka oŋc-loku wan kɔn Esay mɔ. Kɔ Esay ɔŋkɔ dəkulum kəkɔ-pɛn wɛsɛm, pəkɛrɛ.
6
Kɔ Rebeka oloku wan kɔn Yakuba: «Ntɛ t' ine. Papa kam pəcloku wɛŋc əm Esay:
7
‹Məkɛr' em wɛsɛm. Məlompəs' em peri mpɛ indedi, itolan' am pətɔt nde Kanu Kəpɔŋ kəyi mɔ, a ic-fi.›
8
Ndɛkəl oŋ wan kem məcəŋkəl dim dem, məyɔ tɔkɔ indelok əm mɔ.
9
Məkɔ məlɛk' em nde yɔcɔl dacɔ, mir mɔtɔt mɛrəŋ. Ilompsɛ papa kam peri pɔtɔt pəmɔ tɔkɔ ɔmbɔtər pi mɔ.
10
Məndekenɛ papa kam peri papɔkɔ, ntɛ tɔŋsɔŋɛ pətolan' am pətɔt a pəc-fi mɔ.»
11
Kɔ Yakuba oloku kɛrɛ Rebeka: «Ɛy, mba wɛŋc im Esay ɛla cəfon dəris, k'ina iyɔ fɛ ci.
12
Tɔlɔma papa wəkem pəkɔ-wakəs im dis, endecər' em kətɔlomp tɔsɔŋ' em kəsɔtɔ pəlɛc ta isɔtɔ pətɔt-ɛ.»
13
Kɔ kɛrɛ oloku kɔ: «Tɔyɔnɛ fɔ pəlɛc papɔkɔ peder im! Məcəŋkəl gbəcərəm dim dem. Məkɔ məkɛr' em mir.»
14
Kɔ Yakuba ɔŋkɔ pəlɛk mir, k'ɛŋkɛrɛ iya kɔn. Kɔ iya kɔn olompəs peri, pəmɔ tɔkɔ papa kɔn ɛnabɔtər pi mɔ.
15
Kɔ Rebeka ɛlɛk yamos ya Esay wan kɔn wəcɔkɔ-cɔkɔ, yamos yɔtɔt yɔkɔ ɛnatam kəsɔtɔ dɛkɛr mɔ, k'ɔsɔŋ yi wan kɔn wələpəs Yakuba k'ɛmbɛrnɛ.
16
K'oŋkump Yakuba akata ŋa mir mɔkɔ ŋanadif mɔ dəwaca kɔ dəkilim, kəbəp ka mofo mɔkɔ mɛnatɔyɔ cəfon mɔ.
17
Kɔ Rebeka ɔsɔŋ wan kɔn Yakuba peri pɔkɔ ɛnalompəs mɔ, kɔ kəcom.
18
Kɔ Yakuba ɔŋkɔ nde papa kɔn eyi mɔ, k'oloku: «Papa wəkem!» Kɔ Isiyaka owosɛ: «In' ɛwɛ. Mən' an' ɔfɔ-ɛ, Wan kem?»
19
Kɔ Yakuba oloku kas: «In' ɔfɔ Esay wan kam wəcɔkɔ-cɔkɔ. Iyɔ tɔkɔ məlokun' em mɔ. Məyɛfɛ ilɛtsɛn' am, məndɛ məsɔm wɛsɛm wem, ntɛ tɔŋsɔŋɛ məna yati mətolan' em pətɔt mɔ.»
20
Kɔ Isiyaka oloku wan kɔn: «Mba məyeŋk kəsɔtɔ wɛsɛm wan kem!» Kɔ Yakuba oloku: «Kanu Kəpɔŋ kam kəkɛr' em wi.»
21
Kɔ Isiyaka oloku Yakuba: «Məcɔŋnɛ oŋ wan kem, iwakəs əm, icərɛ kɔ pəyɔnɛ fɔ wan kem Esay ɔfɔ-ɛ.»
22
Kɔ Yakuba ɔlɔtərnɛ kas Isiyaka, k'ɛwakəs kɔ k'oloku: «Dim dandɛ da Yakuba dɔ, mba waca wawɛ wa Esay wɔ.»
23
Isiyaka ɛnanɛpəl fɛ kɔ. Bawo waca wɔn wɛnala cəfon pəmɔ waca wa wɛŋc Esay, k'ontolanɛ kɔ pətɔt.
24
K'oloku: «Mən' ɔfɔ məna wan kem Esay?» Kɔ Yakuba owosɛnɛ kɔ fɔ: «Ɛy.»
25
Kɔ Isiyaka oloku: «Məbɛr' em isɔm wɛsɛm wa wan kem, ntɛ tɔŋsɔŋɛ, ina yati itolan' am pətɔt mɔ.» Kɔ Yakuba ɛmbɛrɛ Isiyaka yeri k'endi, k'ɛŋkɛrɛ kɔ sɔ member k'omun.
26
Kɔ kas Isiyaka oloku sɔ: «Məcɔŋnɛ məcup im wan kem.»
27
Kɔ Yakuba ɔŋcɔŋnɛ, k'oŋcup kɔ. Kɔ Isiyaka ene ambɔŋc ŋa yamos ya Esay. K'ontolanɛ kɔ ntɛ: «Ɛy, ambɔŋc ŋa wan kem ŋeyi pəmɔ ambɔŋc ŋa dalɛ ndɛ Kanu Kəpɔŋ kəmpocɛ pətɔt mɔ.
28
Kanu kəsɔŋ əm pəcaŋki pa dareŋc kɔ daka da dəntɔf: Malɔ kɔ member pəlarəm!
29
Kanu Kəpɔŋ kəsɔŋɛ, afum ŋay' əm dəntɔf, Kanu kəsɔŋɛ afum ŋatontnɛn' am! Kanu kəsɔŋɛ məyi awɛŋc əm aŋa kəroŋ, Kanu kəsɔŋɛ awut a iya kam ŋatontnɛn' am dəntɔf! Kanu kəsɔŋ pəlɛc, wəkɔ ɛŋfaŋ' am pəlɛc mɔ, Kanu kəsɔŋ pətɔt wəkɔ ɛŋfaŋ' am pətɔt mɔ.»
30
Isiyaka ɛnadelip kətolanɛ Yakuba, Yakuba endeyɛfɛ kas dəntɔf, kɔ wɛŋc Esay ɛmbɛrɛ pəyɛfɛ dəkəpɛn.
31
Kɔ Esay olompəs sɔ peri k'eŋkenɛ kas Isiyaka. K'oloku kas: «Papa məyɛfɛ məsɔm wɛsɛm wa wan kam, ntɛ tɔŋsɔŋɛ mətolan' em pətɔt məna yati mɔ.»
32
Kɔ kas Isiyaka oloku kɔ: «Mən' an' ɔfɔ-ɛ?» Kɔ Esay oloku kɔ: «In' ɔfɔ wan kam wəcɔkɔ-cɔkɔ Esay.»
33
Kɔ pəyi Isiyaka yama-yama, yama-yama yɔpɔŋ k'oloku: «An' ɔkɔ pəpɛn wɛsɛm k'ɛŋkɛr' em-ɛ? Isɔm yi a kɔ məndeder, intolanɛ kɔ pətɔt. Kətola pətɔt kəlip kəsumpər kɔ.»
34
Ntɛ Esay ene moloku ma kas mɔ, k'ɛmbɛr kəbebe, k'oŋkulɛ-kulɛ pəpɔŋ, k'oloku kas: «Ina sɔ mətolan' em pətɔt Papa.»
35
Kɔ Isiyaka oloku kɔ: «Wɛŋc əm enderɛnɛ cəkɔta k'ɛlɛk kətolanɛ pətɔt kam.»
36
Kɔ Esay oloku: «Cepɔ ntɛ asɔŋ kɔ tewe ta Yakuba mɔ, ti t' ɛŋnɛmpəs' em haŋ kəmɛrəŋ? Ɛnabaŋər im tɔkɔ dəcəmɛ da debeki dem. Kɔ pəndesɔyi tantɛ k'ɛŋlɛkər im sɔ kətolanɛ pətɔt kem.» Kɔ Esay endeŋər: «Papa, məmɛŋkərnɛ fɛ sɔ kətolanɛ pətɔt kəlɔma, məsɔŋ im ki?»
37
Kɔ Isiyaka oloku Esay: «Isɔŋ kɔ kiyi kam kəroŋ, k'isɔŋ kɔ awɛŋc aŋa fəp kiyi kɔ dəntɔf, k'isɔŋ kɔ bəle kɔ member. Cəke cɔ indeyɔnɛ məna-ɛ, wan kem?»
38
Kɔ Esay eyif kas: «Kətola pətɔt kin kaŋkɔ gboŋ kɔ məyɔ ba, Papa? Ina sɔ mətolan' em pətɔt, Papa!» Kɔ Esay ɛyɛfɛ kəbok.
39
Kɔ kas Isiyaka oloku kɔ: «Mənəŋk! Dəkəndɛ dam dɔfɔdeyɔ daka da dəntɔf Kɔ pəcaŋki mpɛ pɛŋyɛfɛ dareŋc mɔ.
40
Dakma dam dendedəsəm doru, Məndeyi wɛŋc əm dəntɔf. Məndeyi tam taciŋa Fənɔntər fam fəndesɔŋɛ, məc-cer kɔ mɛfaŋ mɔn.»
41
Kɔ Esay ɛmɛŋkɛ Yakuba mɛtɛlɛ, teta kətolanɛ pətɔt nkɛ kas ɛnatolanɛ Yakuba mɔ. Esay pəc-cɔpəsnɛ dɛbəkəc, «Mataka ma defi da papa wəkem mɔmbɔlɛ fɛ sɔ. Indedif wɛŋc im Yakuba.»
42
K'aŋkɔ payemsɛnɛ Esay nnɔ iya kɔn Rebeka eyi mɔ. Kɔ Rebeka ewe wan kɔn Yakuba, k'oloku kɔ: «Məne ntɛ wɛŋc əm Esay ɛfaŋ kəluks' am ayɛk mɔ, a pədif əm.
43
Awa wan kem, məcəŋkəl im! Məyɛfɛ, məkɔ məgbɔpnɛ ndena wɛŋc im wərkun Labaŋ nde Haraŋ.
44
Məkɔ məyi di mataka, haŋ mɛtɛlɛ ma wɛŋc əm melip.
45
Kɔ mɛtɛlɛ ma wɛŋc əm mendelip-ɛ, pəpələrnɛ pəcuy pɔkɔ məyɔ kɔ mɔ, indew' am məder. Ta ake tɔ indebutɛ nu mɛrəŋ monu dɔsɔk din-ɛ?»
46
Kɔ Rebeka oloku Isiyaka: «Doru dɛŋgbəf im teta awut aran aHewy. Kɔ Yakuba ɛnɛŋcɛ wəHewy, wan wəran wəka dɔtɔf pəmɔ akaŋɛ, ake indesɔyɔ oŋ doru-ɛ?»