1
K'Abram ɛmpɛrnɛ Misira kəkɔ ka kəca ka Nɛkɛf, nkɔn, wəran kɔn kɔ ca yɔkɔ ɛnayɔ mɔ fəp. Lɔt ŋanasol ti.
2
Abram ɛnasɔtɔ daka dɛlarəm, ɛnala yɔcɔl, pəsam kɔ kɛma.
3
K'ɛyɛfɛ kəcal-cali kəyɛfɛ ka Nɛkɛf haŋ Betel da ɛnadɔf abal tɔcɔkɔ-cɔkɔ mɔ, Betel kɔ Hay dacɔ.
4
Kəca nkɛ ɛnanuŋkɛnɛ kəlompəs aŋgbip ŋa Kanu dənda, k'Abram oŋkornɛ tewe ta Kanu Kəpɔŋ.
5
Lɔt nwɛ ŋanasol mɔ, nkɔn sɔ ɛnayɔ cir, ŋkesiya, cəna kəbəp cəbal.
6
Atɔf ŋɛnafɛtər ŋa kiyi kəŋan tofo tin, bawo yɔcɔl yaŋan yɛnala.
7
Kɔ kəcɔp kənde kəyi akɛk a yɔcɔl ya Abram k'akɛk a yɔcɔl ya Lɔt dacɔ. Atɔf ŋaŋɔkɔ sɔ, aKanahan k'aPerisi ŋanandɛ ŋi tɛm tatɔkɔ.
8
K'Abram oloku Lɔt: «Pəmar fɛ akɛk a yɔcɔl yam ŋacɔp k'akɛk a yɔcɔl yem. Səna sɔ pəmar fɛ su ti, bawo dɛwɛŋca dɔ səyɔnɛnɛ.
9
Antɔf fəp ŋɔ ŋaŋɛ ŋey' əm fɔr kiriŋ mɔ. Kɔ məŋkɔ kəca kətɔt-ɛ, iŋkɔ kəmeriya. Kɔ məŋkɔ kəmeriya, iŋkɔ kətɔt, mba məwosɛ səgbɛyɛnɛ.»
10
Kɔ Lɔt eyekti fɔr k'ɛnəŋk aranta ŋa Yurdɛn tɔkɔ ŋɛndəm mɔ (tɛm tatɔkɔ ta Kanu kəntaləsər Sodom kɔ Komora-ɛ), pəŋckɔ haŋ Cohar pəmɔ aranta (mɛrɛ) ŋa Kanu Kəpɔŋ, pəmɔ atɔf ŋa Misira.
11
Kɔ Lɔt ɛlɛk dalɛ da Yurdɛn fəp, k'ɔŋkɔ kəca nkɛ dec dɛmpɛ mɔ, tatɔkɔ tɔ ŋanagbɛyɛnɛ kɔ Abram.
12
K'Abram ɛndɛ atɔf ŋa Kanahan, kɔ Lɔt ɛndɛ sədare sa aranta ŋa Yurdɛn k'ɔndɔf cəbal cɔn kəca ka Sodom.
13
Afum a Sodom ŋanatesɛ fɛ bəkəc, ŋaŋc-ciya Kanu Kəpɔŋ.
14
Kɔ Kanu Kəpɔŋ kəloku Abram, ntɛ ŋasakɛnɛ oŋ kɔ Lɔt mɔ: «Məyekti fɔr kəyɛfɛ dənda məyi mɔ, məmɔmən kəca kətɔt, kəmeriya nde dec dɛmpɛ kɔ nde dɛŋkalɛ mɔ.
15
Bawo atɔf ŋaŋɛ məŋnəŋk mɔ fəp indesɔŋ əm ŋi kɔ yuruya yam.
16
Indesɔŋɛ yuruya yam yɛla haŋ ta antam kəlɔm ŋa-ɛ, pəmɔ tɔkɔ antɔtam kəlɔm kəbof antɔf kəroŋ mɔ.
17
Məyɛfɛ məkɔt atɔf ŋaŋɛ dobolu kɔ dowokəlu da ŋi, bawo indesɔŋ əm ŋi.»
18
Kɔ Abram eŋcepɛ cəbal cɔn, k'ende pədɔf ci nde tofo ntɛ ŋkiri-ŋa-Mamre yɛŋcəmɛ mɔ kəsək, ta ɔmbɔlɛ Hɛbərɔŋ-ɛ, k'olompəs di dəkəloŋnɛ tewe ta Kanu Kəpɔŋ.